PO CARU RIGORDU MIU E DEIS CARUS BABBU E MAMMA

Giuseppina Boi: fiat nascia in Samassi – su Doxi de Austu de su 1893
In su 1900 ddi fiat mortu su Babbu; fadendi sa domu a unu mannu
Proprietariu Samassesu de nomini Begnaminu Piras.
E Giuseppina impari cuni sorris e su fradi,benianta postusu in
collegiu finas a cancu tenianta quindixannus.
M’apustis de una pariga de annus sa Mamma Maria Murgia si
fiada torrada a isposai cund’unu certu Giuannicu Onnis de Marrubiu.
È ca issa fiada de Sarroch,sindi fiada torrad’a bandai a bidda sua,e
Giuseppina puru andad’a bivi cun sa Mamma, i sorris eis dus fradis.
Ma unu fiat nasciu de su segundu matrimòniu,e si narada
Ferdinandu Onnis.
E Franciscu Serra: ca fiat Babbu miu,fiat nasciu a Senorbi
Su Noi de Marzu de su Milleottuxentus Noranta Sesi:
candu ddì fiat morta sa Mamma teniada dus’annus e mesu
è una sorri de nomini Antonietta fiada sposada cund’unu certu
Giuanni Pala nau Giuseppi. De Caputerra,ma bivianta in Casteddu.
È fadiada s’ortulanu. Aundi immoi c’esti sa prazza affacci de su
Palazziu de sa Regioni in Viale Trentu.
È Franciscu Serra, apustis torrau de su Trentinu.A sa fini de su 1918
Fiad’andau a fai su carrettoneri.
In s’azienda de Orri, deis Marchesus di Villahermosa.
È ingunis connosciada a Giuseppina Boi, e su Millenoixentus Binti
su Binti de Austu si fianta Sposaus.E tenianta quattru fillus,ma ca ddis
fianta mortus, Babbu e Mamma sindi fiant’andaus a bivi a Caputerra.
È ingunis in sa localidadi de suBrugu nasciada Antoni Serra:
su Dexi de Maiu de su Millenoixentustrinta.
È candu teniada sceti Settannus’emesu iada cumenzau a traballai.
Culpa ca su Babbu si fiad’amaladiau a sa vista, po unu scallentamentu
Istudendi fogu in su de s’Ingegnieri Garbellini in Pauliara.
È ddianta depiu operai, è deu fademu a su mangianu a Iscola e su
merì a fai s’ortulaneddu cund’unu certu Efixieddu Casu.
Po primu miat postu a limpiai tueddas;
apusti miada imparau comenti si segada su perdusemini,
èn ci femu lompiu a ndi fai giai settimilla mazzitteddus a sa dìri.
Cund’una paga de quindixi francus a sa cida,
finas a candu mia postu a fai de totu.
Ma sigumenti ca sa paga mi pariat pitica emu cambiau ortu.
E femu andau cund’unu certu Giuanni Cau a s’ortu de s’Algkeresu,
a su costau deis fradis Aramus in Maddalena Spiaggia.